«Елімай» футбол клубы еуропалық клубтар қауымдастығының (ECA) мүшесі болуға шақырту алғандығын қуанышпен хабарлайды. Әлемдік футбол аренада ойып тұрып орын алатын ұйымның қазақ футболының отанына назар аударуы Семейде атқарылған қажырлы еңбектің маңызды көрсеткіші және нәтижесі болып табылады.
ECA-еуропалық клубтардың мүддесі үшін құрылған және ФИФА мен УЕФА мойындаған тәуелсіз ұйым. Бавария Мюнхен, ПСЖ, Ливерпуль, Рома және еуропа континентінің түкпір-түкпірінен келген басқа клубтар сияқты еуропалық футбол грандтарымен бір қатарда болу біз үшін үлкен мәртебе.
ECA мүшелігі біздің клубқа ECA Бас Ассамблеясына қатысуға, сондай-ақ эксклюзивті білім беру, ғылыми-техникалық және спорттық платформаларға қол жеткізуге мүмкіндік береді. Бұл жаңа көкжиектерді ашады және футболды озық әдістермен дамытуға күшті серпін береді.
Елимай ФК басшылығы қауымдастықтың Ньондағы (Швейцария) штаб-пәтеріне ресми кездесу үшін шақырылды, ол туралы қосымша хабарланатын болады.
«Елімай» ФК ECA-ның әділ ойынды қорғау және футболды дамыту жөніндегі құндылықтары мен мақсаттарымен толық бөліседі. Біз осы беделді ұйымның бір бөлігі болғанымызды және футбол дәстүрлерімізді нығайта беретінімізді мақтан тұтамыз.
