«Елімай» футбол клубы қайта құрылғалы бері қоғаммен тығыз байланыс орнатып, ашықтықты ұстанып келеді. Бүгін Семей қаласындағы Спартак стадионында өткен ашық есік күні соның айқын дәлелі болды. Клуб басшылығымен жүздесіп, кері байланыс орнатқан 250-ге жуық жанкүйер футболдың болашағына алаңдаушылық білдіріп, өз пікірлерін ортаға салды.
Елімай – тек негізгі құрамнан ғана тұратын футбол клубы емес, бүгінде 1500-ге жуық тәрбиеленушісі бар үлкен жанұяға айналған. Орталықтың болашаққа қойылған жоспарлары да зор. Бұл туралы орталық басшысы Ефим Германович кеңінен баяндап, алдағы маусымға деген ерекше жоспарларымен бөлісті.
Күні кеше Бурабайда өткен құрылтайда Мемлекет басшысы Қасым-Жомарт Тоқаев Кемелұлы еліміздегі футбол спортының дамуына ерекше назар аударды. Бұл істі Елімай футбол клубы екі жыл көлемінде белсенді қолға алып, одан әрі дамытуды көздеп отыр. Қазақ футболы ұрпақ тәрбиелеу жолында маңызды рөл атқаратынын ұмытпайық. Біз бірге болсақ, көппіз!
